حياكم الله ،،
اليوم معنا طريقة لحم ،، لذييييذه جدا ،، وسهله مره وتعطيكم نتائج حلوه ،،
اول شي نحتاج هالبهارات لتتبيل اللحم ،، ملح ،، فلفل اسود ،، كركم
بعدها نغسل اللحم والافضل يكون لحم فررش مو مثلج ،،
ونتبله ،،
ونجيب اكياس خاصه للشواء ،، هذي صورتها
وهذا نوع ثاني منها ،، اعتبره افضل ،،
واهل السعوديه ،، تلقون افضل اكياس شواء اسمها اكياس look
الفكره بالكيس انه يحفظ النكهه ،، وبنفس الوقت اللحم يظل طري ولين معنا ،،
الحين نحط اللحم داخل هالاكياس ،، ونربطها من فوق ،، الكرتون الاحمر جايه معاه ربطات مغاط ،،
مو حلو ابدا لانه ذاب بالفرن ،، اما الكرتون الاصفر معه ربطات خاصه بلاستيك ماتذوب ،،
نحط تقريبا من ثلاث الى اربع قطع في كل كيس ،،
ندخلها الفرن على درجة حراره ١٧٠ ونشغل الفرن من تحت بس ،، وينطبخ على نار هاديه ،،
طبعا نخليه بالفرن تقريبا ساعتين ونص اذا كانت الاكياس كثيره والذبيحه كبيره ،،
اما ان كانت الذبيحه صغيره ،، ياخذ له تقريبا ساعه ونص ،،
وهذي صوره له من داخل الفرن ،،
لاحظو الكيس منتفخ ،، لا تخافون عادي تماما ،، وبتلاحظون ان فيه مويه ،، مع الوقت المويه تنشف ،،
طبعا لاتخلونها تنشف مررره عشان لا يكون اللحم ناشف انا ابيه يكون طري شوي ،،
وهنا بعد ماطلع من الفرن ،،
وزوووم ،، انتبهو وانتم تفتحون الاكياس ،، يطلع منها بخار حار ،،
نجي الان للرز ،، طبعا الرز نسويه وقت مايكون اللحم بالفرن ،،
اول شي نحمس بصله كامله كبيره مع قرفه وهيل ومسمار ،،
بعدها اذا ذبل البصل ،، نحط ملعقة ثوم وزنجبيل ،،
ونخليه يتحمس معه ،،
بعدها نضيف علبة طماطم معلب ،، يجي قطع ،،مثل هالصوره
ونحط بهارات مشكله وفلفل اسود وكزبره ناشفه ومكعب ماجي وبابريكا ،،
الحين نخليه يتسبك مع بعض ،،
يجوني بنات يقولون سوينا مثل طريقتك بس الصوص نحسه صلصه ،، اسالهم خلتوه يتسبك وقت ،، يقولون لا ،،
اكيد بيكون طعمه صلصه ،، الفكره بالكشنه انها تقعد على النار شوي وتتسبك صح ،،
بعدها نجهز بقدر ثاني ثلاث كاسات رز ابيض نغسله زين ونحطه بقدر ونحط المويه ،، مع قرفه وهيل ومسمار وورق غار
واذا قرب يستوي الرز يعني ثلاث اربعاه استوى ،، نشخله ،، ونطلع المويه الزايده منه ،،
بعدها نرجع نحطه فوق الكشنه تبعنا ،، ونوطي النار عليها ونخليه عشر دقايق ،،
ونرش ع الوجه صفار الزعفران عشان يعطينا اللون الاصفر ،،
ونبدا بتقديم الرز واللحم ،،
نحط الرز بصحن التقديم ،،
بعده فوقه اللحم ونزينه بالي نحبه ،، وهذي صوره كامله له ،،
واخر شي نرش بصل مقلي عليه حسب الرغبه ،،
صوره اقرب للحم ،، اللحم يكون طري جدا كآنه مندي ،،
وبالعااافيه عليكم ،،
،،،
تعليقات
إرسال تعليق