حياكم الله ،،
اليوم معنا طريقة طبخه لاول مره بحياتي اجربها واطبخها واذوقها ،، المحار
طبعا قبل لا اشتريه وبما اني ماقد جربته من قبل ،، بحثت بالنت عن طريقة طبخه وايش انواعه وهل له طريقه بالتنظيف !!
لقيت طرق كثيره له ،، وماكنت ادري انه له طريقه للتنظيف ،، كنت احسب انه مجرد اشتريه واغسله واطبخه ،، !!
لكن لما شريته شفت ان عليه مثل الشنب من الطرف ينسحب وينشال من عليه ،،، وباذن الله تشوفونه تفهمون معي اشلون !!
هالطريقه حسيتها لذيذه وباذن الله تجربونها وتعجبكم ،،
اول شي لما رحت سوق السمك عشان اشتريه ،، لقيت انهم يبعونه كذا بالكميه يعني تكون كميته كبيره بس داخله شوي طبعا
ولما تشترون المحار تكون الصدفه من داخل مقفله تماااما يعني مايمديكم حتى تفتحونها ،،
اول شي ،، اخذت المحار وحطيته بصحن مع مويه عاديه وخليته لمدة ٢٠ دقيقه بالمويه ،،
طبعا بتلاحظون ان الصدفه انفكت شوي من المويه ،، وكل مالها تنفك اكثر مع الطبخ ،،
بعدها حبيت انظفه واسحب الشنب الي قلت لكم عليه ،، شوفوه
طبعا اذا سحبتي الشنب اسحبيه بشويش عشان لا يطلع معه المحار من داخل ،،
وغسلتها بمويه نظيفه من جديد وحطيتها بصحن ،،
وهنا بعد التنظيف،،
بعدها اقطع بصل مكعبات ،، واحمسها بزبده ،،
واضيف لها ثوم ،،
بعدها اذا تحمس البصل زين وصار لونه ذهبي ،، نحط المحار معه ،، ونحطه بشويش ..
بعدها نضيف له فلفل اسود وشوية ملح
ونغطيه لمدة ربع ساعه ،،،
بتلاحظون ان الصدفه كل مالها تنفتح اكثر معكم ،، وفيه يجي لونين من المحار واحد ابيض وواحد اورنج من الداخل ،،
يقولون الاورنج انثى والابيض ذكر ،،
بعد كذا نشيل المحار من القدر ونحطه على جنب ونخلي مويته ،،
ونحط فوق المويه كريمة خفق ،،
وملعقه كبيره خردل ،،
ورشة كزبره ناشفه ،،
ونرجع نحط المحار فوق الكريمه وبشويش عشان لا تنكسر الصدفه معنا
بعدها بصحن التقديم ،، نحط المحار مع رشة بقدونس وليمون اذا حابينه معاه ،،
وهذا من داخل ،،
للي يسآل عن طعمه ،، هو شبيه بالكلاماري ،، بس للامانه الكلاماري الذ ،، وهذا لزج شوي وعيبه ان طعم البحر فيه ،،
وبالنسبه لي كانت تجربه حلوه وتعلمت شي جديد ماكنت اعرفه بالطبخ ،،
وبالعااافيه عليكم يارب ،،
،،،
تعليقات
إرسال تعليق