حياكم الله ،،
وكل عام وانتم بالف صحه وسلامه يارب ،، ورمضان مبارك على الجميع ،، الله يجعلنا من صوامه وقوامه يارب ،،
هذا اول رمضان لي بالمدونه ،، من قبل كان كله بالانستقرام ،، واول موضوع برمضان ينزل بالمدونه ،،
الحلا اليوم راح يتم اعتماده كحلا اساسي في رمضان لانه لذيييذ وسهل وشكل يفتح النفس وتقديمه بطريقه حلوه باشياء
بسيطه ،، انصحكم تجربونه وراح يعجبكم باذن الله ،،
كناااافة اللوتس ،،
بما ان اللوتس الهبه الجديده وكثير منكم يحبونها ،، قررت ندخلها على اغلب الحلويات عندنا ،، وعشان برمضان مايحلا الا
بالكنافه ،، سويت هالكنافه اللذيذه ،،
اول شي نبدا بالمقادير ،،
كنافه شعر والافضل تكون طازجه ،، وبالنسبه للكنافه لبنات ملبورن تلقونها باغلب البقالات العربيه شوفو اقرب بقاله لكم
وتلقونها باذن الله ،، وهالنوع الي استخدمته لذييييذ مره
زبده سايحه بحرارة الغرفه
كاس حليب سايل
اربع ملاعق نشاء
ظرف دريم ويب
كريمة اللوتس ،، وسبق نزلت طريقة كريمة اللوتس في المدونه وهذا رابطها
وبسكوت اللوتس
وللتزيين فستق وتوت
اول شي نجيب الكنافه الشعر ونحط فوقها الزبده السايحه وفركها مع بعض لحد ماتختلط فيها
ونحطها بصواني صغيره تدخل الفرن ونشكلها بحيث نسوي مثل الحفره الصغيره بالوسط عشان نحط الخلطه بعدين
وندخلها الفرن من فوق عشان تتحمر معنا
وع النار نحط الحليب والنشاء ونخليها لحد مايغلي ويثقل الخليط معكم ،،
احينا ممكن يتكتل معكم الخليط عشان النشاء اذا تكتل حطوها بالخلاط
طبعا اذا ثقل الخليط نضيف له ظرف دريم ويب ،، ونخلطه مع بعض ،،
نطلع الكنافه من الفرن
ونحط ملعقه من كريمة اللوتس الي سويناها قبل كذا
وملعقه من الخلطه تبعنا الي سويناها ،،،
ونبدا نزينها ،،
استخدمة للتزيين بسكوت اللوتس وكسرت شوي منه فوقها وحطيت توت وفستق مطحون ،، ممكن لللي يحبها حاليه زياده
وقت التقديم يحط لها شيره ،، لكن انا ما انصحكم لان كذا حلاها مضبوووط مره ،،
طبعا حلاتها تاكلونها حاره بوقتها ،،
وبالعااافيه عليكم ،،
،،،
تعليقات
إرسال تعليق