حياكم الله
اليوم معنا طريقة كعكه جميييله جدا راح نتعرف عليها من خلال هالمعلومات ،،
السكونز هو خبز انجليزي صغير واصله من اسكتلندا ومشهور في استراليا ايضا وايرلندا وكندا
لا تدخل الخميره في مكوناته ويصنع فقط من البكينج باودر
يقدم السكونز كوجبه مرافقه savory ومنه ما يدخل فيه البطاطا ويطلق عليه tatties scones
ومنه يكون حلو وهو السكونز التقليدي في بريطانيا
وفي امريكا يدخل فيه الفواكه وخاصه البيري او الزبيب او التمر او يطعم بنكهات متل ماء الودر والزهر
انا اعتبره شيء بين الكيك وبين الخبز ،، طعمه لذييييذ جدا ،، فيه منه
حالي ومالح ،، بالنسبه لطريقته ماتتخيلون كيف كنت شايله همه ،،
خاصة اني فاشله جدا بالعجن ،، لكن والله لما سويتها جدا سهله
والعجينه مرررره طريه بشكل ماتتخيلونه ،، وباذن الله تسوونه
وتجربون بنفسكم ،،
اول شي معنا هالمقادير ،،
وقبل كل شيء شغلو الفرن وخلوه على نار هاديه ،،
٣ كاسات دقيق ،، الدقيق المستخدم عندي كان دقيق خاص مايحتاج نضيف بيكنج بودر ،، لكن الي ماعنده الا الدقيق
العادي ،، يضيف بعد ملعقه كبيره بيكنج بودر ،،
كأس كريمه ثقيله ،، او كريمة الخفق للحلويات ،،
كأس مشروب غازي بالليمون او سيفن اب ،،
واخر شي ثلاث ملاعق كبيره سكر ،، حسب الرغبه
نبدآ نحط الدقيق ،،
بعده الكريمه ،،
بعده المشروب الغازي ،، مع السكر
ونبدآ نعجن باليد او بالعجانه لمدة عشر دقايق الى ربع ساعه ،، بتلاحظون ان العجينه لييينه مرره وجميييله كآنها اسفنج ،،
بعدها نخليها ترتاح شوي ،، ونجيب اي صينيه عندنا انا استخدمة صينية الكوب كيك ،، وندهنا بزبده او زيت ،،
ونقسم العجينه كور صغيره بحجم الصينيه ،،
وبعدها ندهن على الوجه صفار بيض ،، حسب الرغبه
وندخلها الفرن لمدة عشرين دقيقه ،، من تحت لحد ماتستوي وبعدها نحمرها من فوق ،، ماتتخيلون الريحه الجميله الي تطلع
وحلاتها تاكلونها اول ماتطلع من الفرن ،،
الميزه في السكونز انه يقعد فتره طويله مثل الخبز والكيك العادي ،، يعني اذا سويتي كميه ،، بيقعد فتره معك ،، بس مجرد ماتحمينه بالمكرويف ترجع فررررش ،، ولذيييذه ،،
طبعا من المتعارف عليه وقت التقديم انها تتقدم مع مربي اي نوع تحبونه ،، وقشطه ثقيله شوي ،،
افضل مربى بالنسبه لي مربى مزرعة الفراوله بملبورن ،، وكريمة السكونز تنباع بالسوبرماركت هنا بملبورن ،،
وهنا وقت التقديم ،،
وبالعااااافيه عليكم ...
،،،
تعليقات
إرسال تعليق